C__EV__0209_10442_001
Sene:1198.Z.29
Konu: Konya sancağında Lârende Kalesi mustahfızlarından Boyaroglu Ahmed Bey ile Lârende’de medfun Seyh Alâeddin Rumi Tekkesi Evkafı mütevellisi ve Şeyhi olan Abdullah'ın mürâfa’aları neticesinde vakıf araziye müdâhale olunmaması hakkında hüccet verilmiş olduğundan, gerekli emrin itası.
VERİLEN FERMAN KAYDI
Lârende ve Belviran Naibleri zîde ilmühümaya ve Konya Mütesellimine hüküm
Konya sancağında Lârende nahiyesinde vakf-ı zaviye-i Şeyh Alâeddin der nefs-i Lârende deyu yazıldığı mahalde;
Arazi der-karye-i Çavuşyeri ba-hükm-i merhum Sultan Mehmed Han der-tasarrufu ceddim zaviye Alaeddin hâsıl an munasefe ortakcıyan an gallât ve nısf-ı öşr-i Kavak ve zemin der karye-i Gödregömü üç kıta bağ der karye-i Çaruklar Defter-i atikte mestur. Haliyen na malum deyu mestur yekün maa gayrihi mahsulattan zaviye-i mezkure altı yüz yetmiş akçe yazu ile defter-i evkafta muharrer kalemiyle tahrir ve Belviran nahiyesine tabi on nefer reaya ve dört zemin ile
Karye-i Çaruklar ve hâsılı tahtında öşr-i gallat ve salariye resm-i çift ve bennak vechi ve öşr-i bağ ve kendüm ve şair ve gayrihi yekün maa gayrihi bin sekiz yüz kırk dört akçe yazu ile defter-i mufassalda muharrer kalemiyle tahrir
ve defter-i icmalde hass-ı hümayun mülhakatı ve Lârende kazası muzafatından Kaş nahiyesine tabi yüz kırk dokuz nefer reaya ve on bir zemin ile karye-i Emirşah ve hâsıl tahtında öşrü gallat ve salariye ve resm-i çift ve bennak vechi ve öşr-i bagat ve kendüm ve şair ve gayrihi yekün on bir bin iki yüz doksan dokuz akçe yazu ile defter mufassalde muharrer kalemiyle tahrir
ve defter-i icmalde Mirimiran-ı vilayet-i Karaman hassı mülhakatı ve yine nahiye-i mezbure tabi yüz yirmi sekiz nefer reaya ve dört zemin ile karye-i gödüre ve hâsıl an öşr-i gallat ve salariye ve kendüm ve şair ve resm-i ift ve bennak vechi yekün maa gayrihi altı bin otuz akçe yazu ile defter-i mufassalda muharrer kalemiyle tahrir
ve defter-i icmalde Vezir-i azam Siyavuş Paşa hassı mülhakatı olduğu defter-i hakanide mukayyed ve mûmâ- ileyh es-Seyyid şŞeyh abdullah zikr olunan Şeyh alaeddin zaviyesi vakfının bâ-berat-ı âli-şan zaviye ve vakfının mütevellisi olmakla
Karye-i Emirşah ve karye-i Gödregömü ve karye-i Çaruklar el-mezburelerden Şeyh alaeddin zaviyesi vakfına tahrir ve tahsis kılınan zeminler ve bağ elmezbureleri ber muceb-i defteri hakani zaviye-i mezbure vakfı tarafından zabt ve zikr olunan Emirşah ve Gödregömü karyelerinden Zeminler ve Çaruklar karyesinde olan bağda eser-i kürümü kalmayıp kabil-i ziraat olmakla ol bağ arazisinde ziraat edenlerin ziraatleriyle hâsıl eyledikleri terekelerinden şer‘ile müteveccih olan onda bir öşürlerini zaviye-i mezbure vakfı tarafından ahz ve kabz etmek murad eyledikte dah olunmak icap etmez iken
havass-ı Hümayun mutasarrıfları olanlar karye-i Çaruklar ve karye-i Emirşah ve karye-i Gödregömü elmezburelerden zaviye ve vakfa tayin ve tahsis kılınan zemin ve bağ arazilerinden maada arazi-i sairelerini havass-ı hümayun caniblerinden zabt ve ziraat eylediklerin ziraatleriyle hâsıl eyledikleri terekelerinden sekizde bir öşür ve salariyerini ahz ve kabza adem-i kanaat-birle Lârende kalesi Kethüdası Hasan ve oğlu Ahmed demekle maruf kimesneler ile yekdil olarak zaviye vakfı olan zeminler ve bağ arazilerini hilaf-ı defter-i hakani ve muğâyir-i kanun fuzuli müdâhale ve zabt birle ğadr-i küllî eylediklerin ve bu babta davasına muvafık fetva-yı şerife verildiğin Şeyh mûmâ- ileyh mukaddema ba-arzuhal ledelinha vel-istida defterhane-i amiremde mahfuz defter-i icmal va mufassal defter-i evraka müracaat olundukta:
vech-i meşruh üzere olduğu mestur ve mukayyed ve Divan-ı hümayunumdan kanunu sual olundukta: karye-i Emirşah ve karye-i Gödregömü ve karye-i Çaruklar elmezburelerden Şeyh alaeddin zaviyesi vakfına tayin ve tahsis kılınan zeminler ve bağ elmezbureleri zaviye-i merkume vakfı tarafından zaviye vakfı olan zeminler ve bağattan maada arazi-i sairelerini hass-ı mezkurler tarafından mutasarrıfına ber-muceb-i defteri hakani zabt ve zikr olunan Emirşah ve Gödregömü karyelerinde zaviye-i merkume vakfına tayin olunan zeminler ve Çaruklar karyesinde zaviye vakfı olan bağın eser-i kürümü kalmayıp kabil-i ziraat olmakla ol bağ arazisinde ziraat edenlerin ziraatleriyle hâsıl eyledikleri terekelerinden şer‘ile müteveccih olan onda bir öşürleri zaviye vakfı tarafından zemin ve bağat arazilerinden maada arazi-i sairelerinden ziraat eylediklerin ziraatleriyle hâsıl eyledikleri terekelerinden kanun üzre sekizde bir öşür ile salariyeleri hass-ı merkum mutasarrıfları tarafından ahz ve kabz ettirilmek mukteza-yı emr-i hakani ve muvafık-ı kanundur deyu tahrir olunmakla.
Defter-i hakani mucebince kanun üzere amel olunmak babında İkiyüz yirmi üç senesi evasıt-ı rebiülahirinde sâdır olan emri şerifiirad ve tecvizi niyaz olunmağın.
Mukaddema sâdır olan emr-i âli ile amel olunmak babında Karaman valisine hitaben iki yüz yirmi dört senesi Rebiülevvelinde ita olunan emr-i şerif le Şeyh mûmâ- ileyh e Lârende mahkemesine varıp Lârende Kalesi kethüdası merkum Seyyid Ahmed veled-i Hasan Kaş nahiyesinde Emirşah nam karye ve gayriden iki bin sekiz yüz akçe gedik tımara mutasarrıf Lârende kalesi kethüdalığına mutasarrıfa gedik tımarının başkalemi olup müşterekle kaydına dahil olup marruzzikir Emirşah karyesiyle tahtında muharrer çiftliğ-i Yunus der-yedi Mehmed an karye-i Çaruklar müşterekle gedik tımarı tarafından zabt olunduğuna kanaat etmeyip
Çaruklar karyesinde zaviye-i mezbure vakfına tahrir ve tahsis kılınan bağ için gedik tımarının başkalemi olan Emirşah karyesi arazisindendir deyu hilaf-ı defter-i hakani vech-i muharrer üzre
C_EV_00209_10442_002
Sene:
Konu:
sâdır olan emr-i alişana muğâyir müdâhale olunmamak matlubdur deyu iddia eylediğin Kethüda-yı merkumun hilaf-ı defter-i hakani ol vecihle vâki olan müdahaleden keff-i yedine tenbih olunmakla.
Fima bad muğâyir-i tenbih ve hilaf-ı defter-i hakani Çaruklar karyesinde zaviye-i merkum vakfına tahrir ve tahsis kılınan bağ-ı mezkure müdâhale ve taarruz eylemesini havi mukaddema defter-i hakani mantuku üzere sâdır olan emr-i hümayunum muebince amel olunmak için tekiden müceddeden emr-i şerifimitasını Şeyh mûmâ- ileyh rica etmekle
Sen ki mevlana-yı mûmâ- ileyh (boş) zîde ilmühüsün ol babta hükm-i hümayunum verilmek ricasına vâki-i hali bililtimas arz ve tekrar defterhane-i amiremde mahfuz ruznamçe-i hümayun ve defter-i icmal ve mufassala müracaat olundukta:
dokuz nefer reaya ve bir zemin ile karye-i Emirşah tahtında çiftliğ-i Yunus veledi Süleyman der yed-i Mehmed an karye-i Çaruklar der yed-i Mehmed veled-i Musa dönüm altı bin akçe yazu ile ve salariye ve kendüm ve şair ve resm-i çift ve bennak vechi yekün ma gayrihi altı bin akçe
Ve defter-i mufassalda muharrer kalemiyle tahrir ve defter-i icmalde Emirşah karyesinin yazu-yı mezburesinden iki bin akçesi ifraz ve kale-i merkume kethüdalığına mahsus bir gedik tımar ve beratla babası mezkur Hasanın üzerinde fevtinden iki yüz yirmi dört senesinde oğlu merkim Seyyid Ahmede tayin ve halen üzerinde
Ve Lârende nahiyesine tabi neferat ile karye karıklı nam-ı diğer yörükan an cemaat-i izzetlü ve tahtında neferakt ile karye-i Çaruklar nam-ı diğer Mezitli an cemaat-i izzetlü ve hâsıl akçe ve resm-i bennak vechi ve öşr-i kavak ve bad-ı heva ve arus bin beş yüz akçe yazu ile defter-i ... muharrer kalemiyle tahrir
Ve defter-i icmal Mirimiran-ı eyalet-i Karaman hâsılı mülhakatı ve yine Kaş nahiyesinde mezraa-i karaçardak ve-karye-i Çaruklar vakf-ı medrese-i Emir Musa der Lârende haric ez-defter ve Kürd nam karye halkı ziraat ederler ve hâsılı kendüm ve şair ve gayrnihi yekün maa gayrihi …yüz akçe yazu ile
Defter-i mufassalda muharrer kalemiyle tahrir ve defter-i icmalde mezraa Karaçardak salariye iki yüz akçe yazu-yı mezkuresiyle tahrir ve Kaş nahiyesinde karye Kuyucak kışla maa gayrihi biriktirilip on bin beş yüz akçe ber-icmal ve icmal-i mezkurun bin akçesi Konya nahiyesinde Belviran nam karye ve gayriden bin beş yüz akçe tımara mutasarrıfa salih veledi süleymanın ve icmal-i mezkurun baki müşterekleri kayd-ı mezburda olduğu mestur ve divan-ı hümayunda mahfuz kuyud-ı ahkama müracaat olundukta vechi meşruh üzere tarih-i mezkurda emri şerif fim verildiği mukayyed bulunmağın defter-i hakani ve mukaddema sâdır olan emr-i şerifimmuebince amel olunmak babında. Fî evâhir-i L sene 1225 tarihinde divan-ı hümayun tarafından emr-i âli verildiği mukayyedtir. Ferman devletlü sultanımındır.
(aynı sahife ki ikinci vesika)
Maruz-ı bendeleridir ki:
Konya sancağında Lârende nahiyesinde Zaviye-i Şeyh Alaeddin der-nefs-i Lârende deyu yazıldığı mahalde; arazi Der karye-i Çavuşyeri ba-hükm-i merhum Sultan Mehmed Han der-tasarrufu ceddim Şeyh Alaeddin hâsıl an munasefe ortakcıyan an gallât ve nısf-ı öşr-i Kavak ve zemin der karye-i Emirşah ve zemin der karye-i Gödregömü üç kıta bağ der karye-i Çaruklar Defter-i atikte mesturdur. Haliyen na malum deyu mestur yekün maa gayrihi mahsulattan zaviye-i mezkure üç yüz yetmiş akçe yazı ile defter-i evkafta muharrer kalemiyle tahrir ve Belviran nahiyesine tabi on beş nefer reaya ve dört zemin ile
karye-i Çaruklar ve hâsılı tahtında öşr-i gallat ve salariye resm-i çift ve bennak vechi ve öşr-i bağ ve kendüm ve şair ve gayrihi yekün maa gayrihi bin sekiz yüz kırk dört akçe yazu ile defter-i mufassalda muharrer kalemiyle tahrir
ve defter-i icmalde hass-ı hümayun mühakatı ve Lârende kazası muzafatından Kaş nahiyesine tabi yüz kırk dokuz nefer reaya ve on bir zimmi ile karye-i der Beyen ve hâsıl tahtında öşrü gallat ve salariye ve resm-i çift ve bennak vechi ve öşr-i bagat ve kendüm ve şair ve gayrihi yekün maa gayrihi on bir bin iki yüz doksan dokuz akçe yazu ile defter mufassalde muharrer kalemiyle tahrir
ve defter-i icmalde Mirimiran-ı vilayet-i Kanaman hassı mülhakatı ve yine nahiye-i mezbure tabi yüz yirmi sekiz nefer reaya ve dört zemin ile karye-i gödüregömü ve hâsıl an öşr-i gallat ve salariye ve kendüm ve şair ve resm-i ift ve bennak vechi yekün maa gayrihi altı bin üç yüz otuz üç akçe yazu ile defter-i muf assalda muharrer kalemiyle tahrir
ve defter-i icmalde Vezir-i azam Siyavuş Paşa hassı mülhakatı ve yine Kaş nahiyesine tabi on dokuz nefer reaya ve bir zemin ile karye-i Emirşah ve tahtında çiftlik-i Yunus veledi Süleyman der-yed-i Mehmed an karye-i Çaruklar haliyen der yed-i Mehmed veled-i Musa on altı bin akçe yazu ile defter-i mufassalde muharrer kalemiyle tahrir.
Ve defter-i icmalde Emirşah ve tahtında çiftlik-i Yunus veledi Süleyman der-yed-i Mehmed an karye-i Çaruklar haliyen der yed-i Mehmed veled-i Musa on altı bin akçe yazu ve salariye ve kendüm ve şair ve resm-i çift ve bennak vechi yekün maa gayrihi altı bin akçe yazı ile Defter-i mufassalde muharrer kalemiyle tahrir
Ve defter-i icmalde Emirşah karyesinde yazu-yı mezkuresinden iki bin akçesi ifraz ve Lârende kalesi kethüdalığına mahsus bir gedik icmal ve beratla Seyyid Ahmedin üzerinde olduğu defter-i hakanide mukayyed ve es-Seyyid Eş-Şeyh abdullah zikr olunan Şeyh alaeddin zaviyesi vakfının bâ-berat-ı âli-şan zaviydarı ve vakfının mütevellisi olmakla
Karye-i Emirşah ve karye-i Gödregömü ve karye-i Çaruklar el-mezburelerden Şeyh alaeddin zaviyesi vakfına tahrir ve tahsis kılınan zeminler ve bağ elmezbureleri ber muceb-i defteri hakani zaviye-i mezbure vakfı tarafından zabt ve zikr olunan Emirşah ve Gödregömü karyelerinden Zeminler ve Çaruklar karyesinde olan bağda eser-i kürümü olmayıp kabil-i ziraat olmakla ol bağ arazisinde ziraat edenlerin ziraatleriyle hâsıl eyledikleri terekelerinden şer‘ile müteveccih olan onda bir öşürlerini zaviye-i mezbure vakfı tarafından ahz ve kabz etmek murad eyledikte havass-ı Hümayun mutasarrıfları olanlar karye-i Çaruklar ve karye-i Emirşah ve karye-i Gödregömü elmezburelerden zaviye ve vakfa tahrir ve tahsis kılınan zemin ve bağ arazilerinden maada arazi-i sairelerini havass-ı hümayun caniblerinden zabta adem-i kanaat-birle Lârende kalesi Kethüdası merkum Seyyid Ahmed ile yekdil olarak zaviye vakfı olan zeminler ve bağ arazilerine fuzuli müdâhale ve zabt birle ğadr-i küllî eylediklerin Şeyh Musa ile mukaddema ba-arzuhal ledel-inha vel-istida kuyudat-ı defter-i hakaniden ve kuyudat-ı divan-ı hümayundan badel-ihrac. Defter-i hakani mucebince kanun üzere amel olunmak babında
Yorumlar
Yorum Gönder